Á sýningunni „Heimur í orðum“ í Eddu gefst fólki kostur á að skoða handrit frá ýmsum tímum. Reglulega er handritum skipt út, enda þola þau ekki að vera lengi í sýningarkössum. Eitt þeirra handrita sem nú er komið á sýninguna í Eddu er Lbs 1077 8vo, sem skrifað var árið 1783 af Ólafi Guðmundssyni á Vindhæli. Handritið er varðveitt á handritasafni Landsbókasafns. Handritið inniheldur meðal annars Margrétar sögu sem segir frá því „hvernig mærin Margrét gerist kristin en er rekin að heiman og síðar hneppt í fangelsi fyrir trú sína“ eins og segir á heimasíðu sýningarinnar. Heilög Margrét var verndardýrlingur kvenna í barnsnauð og sagan var túlkuð sem hliðstæða giftusamlegrar fæðingar. Handrit sem geyma Margrétar sögu eru smágerð svo auðvelt var fyrir ljósmæður að ferðast með þau og sængurkonur að hafa þau nærri sér.

Handritið er skrifað á pappír og fest í skinnkápu. Ásaumaður skinnþvengur, þrískiptur, er festur við kápuna og vafinn um handritið. Útlit handritsins ber vott um mikla notkun þess.