Þann 14. nóvember afhenti sendiherra Þýskalands menningar- og viðskiptaráðherra prentsmiðjuhandrit Jóns Árnasonar að Íslenzkum þjóðsögum og æfintýrum til varðveislu í Landsbókasafni við hátíðlega viðhöfn. Handritið var lengi talið glatað en kom í leitirnar í Bayerische Staatsbibliothek í München árið 1971, þar sem það hefur verið varðveitt síðan. Ávörp fluttu Lilja Dögg Alfreðsdóttir menningar- og viðskiptaráðherra, Clarissa Duvigneau, sendiherra Þýskalands, Ingibjörg Steinunn Sverrisdóttir landsbókavörður, Örn Hrafnkelsson sviðstjóri varðveislu í Landsbókasafni og Vilhjálmur Bjarnason hvatamaður verkefnisins.